Rydym am recriwtio Swyddog Coed a Gwrychoedd parhaol/rhan amser i ymuno â’n Tîm Cadwraeth.

Mae’r rôl yn golygu cynorthwyo’r Awdurdod Lleol yn ei ddyletswydd statudol i warchod Coed a Gwrychoedd o fewn y sir, drwy roi deddfwriaeth statudol berthnasol ar waith, a darparu cyngor a chymorth i amrywiaeth o randdeiliaid ar unrhyw faterion sy’n ymwneud â choed a gwrychoedd.

Bydd y prif ddyletswyddau’n cynnwys:

• darparu gwybodaeth ac arweiniad ar Orchmynion Diogelu Coed (TPOs) gan gynnwys llunio, addasu a diddymu TPOs, ac ar gyfer rhanddeiliaid ar Reoliadau Gwrychoedd
• prosesu ceisiadau ar gyfer gwaith ar goed TPO a/neu goed o fewn Ardaloedd Cadwraeth, a phrosesu Hysbysiadau Tynnu Gwrychoedd, gan argymell cymeradwyo neu wrthod i’r Swyddog Arweiniol Corfforaethol
• adolygu canllawiau TPO a chynnal ac adolygu mynediad ar-lein at ddata TPO
• darparu adroddiadau proffesiynol ar gyfer PEDW (Penderfyniadau Cynllunio ac Amgylchedd Cymru) ar benderfyniadau TPO a Hysbysiadau Tynnu Gwrychoedd yn ystod y cam apêl
• cynnal a diweddaru cronfa ddata TPO Cyngor Sir Ceredigion a haenen System Gwybodaeth Ddaearyddol (GIS) TPO
• darparu ymatebion ymgynghori ar gyfer Cyfoeth Naturiol Cymru ar goetiroedd sydd wedi’u gwarchod gan Orchmynion Diogelu Coed sy’n destun Ceisiadau am Drwydded Cwympo
• darparu ymatebion ymgynghori ar gyfer swyddogion cynllunio ac asiantaethau allanol ee Cyfoeth Naturiol Cymru, Dŵr Cymru, yn unol â BS5837 ac asesu addasrwydd cadw coed, gwrychoedd a chloddiau ar safleoedd arfaethedig lle bo’n briodol
• dosbarthu Hysbysiadau Cadw Gwrychoedd
• llunio arweiniad ar faterion coed a gwrychoedd perthnasol i’w cynnwys ym mholisïau a chanllawiau Cyngor Sir Ceredigion
• darparu cyngor proffesiynol ar goed, gwrychoedd a chloddiau ar gyfer Swyddogion CSC a thimau CSC gan gynnwys:
  • rheoli coed, gwrychoedd a chloddiau
  • plannu coed, llwyni a gwrychoedd newydd yn gysylltiedig â chynigion tirlunio
  • arweiniad ar warchod, rheoli a thrawsleoli cloddiau
• mewnbwn i Bolisi Diogelwch Coed Cyngor Sir Ceredigion ar goed sydd ar dir sydd dan berchnogaeth a rheolaeth Cyngor Sir Ceredigion
• gweithio gyda Phartneriaeth Natur Leol Ceredigion i sefydlu a gweithredu cynllun Wardeniaid Coed Gwirfoddol y Cyngor
• ymgysylltu â ‘The Tree Council’ a sefydliadau eraill, yn lleol a chenedlaethol ar amwynder a phlannu a sefydlu gwrychoedd coed
• gweithio gyda chydlynwyr gwirfoddol eraill Cyngor Sir Ceredigion a chynnig cyfleoedd i wirfoddolwyr eraill
• unrhyw ddyletswyddau eraill sy’n gymesur â’r rôl yn unol â gofynion y rheolwr llinell

Rydym am recriwtio unigolyn sydd â’r rhinweddau canlynol:

• gwybodaeth dda o ddeddfwriaeth a chadwraeth coed a gwrychoedd
• yn angerddol dros warchod yr amgylchedd
• sgiliau cyfathrebu ysgrifenedig a llafar ardderchog, a’r gallu i gyfathrebu ar bob lefel, gan gynnwys siarad yn gyhoeddus
• yn gyfforddus yn delio ag aelodau’r cyhoedd ac ar adegau o wrthdaro
• sgiliau rhyngbersonol a sgiliau cyflwyno ardderchog.
• hyblygrwydd
• dealltwriaeth dda o iechyd a diogelwch a’r gallu i gynnal asesiadau risg
• sgiliau diplomyddol a thrafod ac ymwybyddiaeth wleidyddol
• prawf o’r gallu i weithio’n annibynnol ac fel aelod ymroddgar o dîm
• yn sensitif i gyd-destun gwleidyddol a sefydliadol llywodraeth leol
• yn gallu gweithio yn yr awyr agored ymhob tywydd
• y gallu i deithio yn unol â gofynion sefydliadol

Yn ogystal â’r uchod, rydym am gael unigolyn sy’n gymharol rugl yn y Gymraeg. Bydd ymgeisydd llwyddiannus sydd heb y sgiliau gofynnol yn y Gymraeg yn cael cefnogaeth lawn i gyrraedd y safon ddymunol o fewn dwy flynedd o’r penodiad.

Yn gyfnewid am eich sgiliau a’ch ymrwymiad, rydym yn cynnig amryw o fuddiannau ichi fel gweithiwr, gan gynnwys lwfans gwyliau blynyddol cystadleuol a chynllun pensiwn hael. Mae mwy o wybodaeth am ein hystod eang o fuddiannau ar gyfer gweithwyr ar gael yma.

Hefyd, rydym wedi ymrwymo i ddatblygu ein pobl a byddwn nid yn unig yn darparu cymorth i’ch galluogi i berchnogi prif feysydd cyfrifoldeb y rôl hon yn gyflym ac yn hyderus, ond rydym hefyd wedi ymrwymo i gefnogi’ch datblygiad er mwyn ichi allu symud ymlaen yn eich gyrfa gyda ni.

Credwn fod cydbwysedd bywyd a gwaith yn holl bwysig. I’ch cefnogi i gyflawni hyn, bydd gennych fynediad at y buddion dewisol canlynol:

• Gweithio Hybrid:Yn amodol ar fodloni rhai amodau, gallwch ddewis gweithio o’ch cartref neu mewn swyddfa. 
• Amser-fflecsi:Gellir gweithio oriau o fewn lled band diffiniedig, o ddydd Llun i ddydd Gwener, yn amodol ar anghenion gwasanaeth.

Disgrifiad Swydd a Manyleb Person

Am fwy o wybodaeth cysylltwch â: alison.heal@ceredigion.gov.uk; sarah.smyth@ceredigion.gov.uk

Dyddiadau cyfweld dros dro: 10fed a / neu 11eg o Hydref.

Noder: Cedwir yr hawl i ymestyn y dyddiad cau.